黃子恆單嘢呢兩日真係比人瘋傳!但點解個個都話係男方錯先?有Blogger從女性角度出發睇件事,仲問想食妹妹嘅男藝人 vs 想整死你嘅女粉絲,到底邊個先係贏家?

以下轉自Nanaki.名無き少女的吶吶期。

画像に含まれている可能性があるもの:1人、テキスト

黃子恆同個自稱係小妹妹嘅28歲內地女粉絲發生關係,結果女方向傳媒爆料話佢始亂終棄玩失蹤,搞到今日成個wall都講緊呢件事咁。

其實,啲男明星向女粉絲下手都唔係咩新聞⋯ 呀,對唔住,或者應該講,啲女粉絲向男明星下手都唔係今日先有嘅事🙊✨

我個人冇咩留意開香港娛樂圈,只可以同大家分享下我所知嘅一啲日本Band仔生態。

最多人識嘅應該係one ok rock 鼓手TOMOYA,雖然傳媒只係聚焦同佢發生關係嘅少女係未成年呢點,冇咩人研究個女仔本身係咪FANS,不過個女仔的確係喺「ONE OK ROCK」嘅慶功宴上識到TOMOYA, 然後仲喺ONE OK ROCK嘅live完咗之後同TOMOYA發生第二次關係。佢哋個共通點都係見1. 第一次/第二次面就獻哂身⋯ 2. 完事後以受害人身份爆對方大鑊。

不過呢單都係小意思,啲冇咩人識嘅地下團先精彩,你哋真係以為啲日本妹妹個個都好純情?🤔 求其google打幾個關鍵字都有一堆V系bandman素顏瞓覺、同女FANS行街,甚至係比人影嘅裸照等等⋯ 佢哋稱呢啲叫「晒し」,總之就係想比全世界睇到對方嘅個人資料/唔見得光嘅嘢。而佢哋為咗可以行到呢一步會不惜「猫被り」扮乖乖女、「蜜」直接比錢(通常5位數字起跳)/買貴禮物送比啲男人等等,就好似有啲女仔下海做AV女優然後用啲錢「貢」個牛郎男朋友⋯(i.e.星奈あい)當然,有啲女仔係真係純粹想同對方多啲接觸嘅機會,但咁病態嘅關係下,有啲女仔一時諗唔開真係好易心理唔平衡,一係自殘一係想睇住你死⋯

雖然我都係一個女仔,但有啲嘢需要公道啲講🤔 平時啲男人同完個女仔發生關係又唔理人走咗去,真係幫唔落,因為十個有九個都係男仔做主動氹女仔落嗒,你唔係仆街邊個係?但男藝人就唔同,通常都係啲女Fans千方百計要接近佢哋,存心想同佢哋發展更親密嘅關係。的確,你送上門送到咁又有啲姿色嘅話,自制力差啲又貪玩嘅男人真係好難拒絕,難聽啲就係宜家啲人成日講嘅「免費X」。但,注意返,係貪玩嘅男人先會中招,所以再難聽啲講你只係一件玩具🤦🏻‍♀️千祈唔好覺得佢哋會想同你認真發展,更唔好講想人娶你做老婆/同元配離婚🐒 。

有啲女粉絲就大概正正係想用呢個世俗觀?打算捉到啲男明星痛腳,實行要唔到佢個人都可以要佢名譽掃地一齊攬住死。雖然好殘酷嘅現實係,就桃色醜聞而言,無論Tomoya又好,定ゲスの極み乙女個主唱都好,佢哋嘅事業似乎都喺醜聞過後更上一層樓,根本no one cares 佢哋私生活曾經有幾不堪⋯ 大部分樂迷都只係在意佢哋喺音樂上嘅成就(所以話一技傍身真係好重要omg!)無論男仔女仔都好,與其想靠肉體關係感受一瞬間「被愛」嘅感覺,倒不如自己學下點愛自己,對自己好啲、增值下,嗰啲嘢先係可以真正跟到你,保護你自己一世🤦🏻‍♀️

不過,講經大家都識講,雖然我內心係心痛某啲奉獻型嘅女仔,不過都有好多人係純粹玩家型,佢哋淨係想要刺激想要認同感想滿足自己佔有欲。點解咁多人唔搵係要搵男明星?總有啲人係純粹為咗嗰份獵奇心、虛榮感。總之,佢哋就係感覺行先,唔會諗長遠,想有人永遠記住佢哋,就算係最討厭嘅存在,佢哋都要喺你腦海中永遠留一席位。

字轉於Nanaki.名無き少女的吶吶期。|圖:Twitter、Instagram