環保意識係現今社會越來越受人重視,唔少餐廳響應而唔再提供餐具或飲管。不過網民Yin Arlslum 琴日(18日)就去左添好運點心將軍澳分店,想用3個大餐盒買點心。點知店員拎出8個發泡膠盒,叫佢自己裝!

 

事主話,佢自備左3個唔同尺寸嘅食物盒去買13籠點心,但係店員睇都未睇佢訂咩野食就直接拒絕,話唔夠位放。佢表示明白餐廳怕麻煩同埋衛生問題,所以佢就提出當堂食咁拎出黎,佢自己夾入盒,真係唔夠位先再用發泡膠盒,而當時店員都應承咗。

但係當食物嚟到,竟然係8個發泡膠盒裝住啲食物,仲叫佢要用餐盒就自己夾入盒啦!令Yin Arlslum喺Facebook度講,唔想自己同同事食到發泡膠食物,而且亦係為左環保同海洋。但係添好運點心貴為著名米芝蓮餐廳竟然咁樣做,令佢好失望。

而添好運嘅店經理就表示,當時係繁忙時間,而且點心分開咗好多部門製作,好難集中放進客人準備嘅盒入面。加上按食物口感、味道分類入盒,所以13樣點心用8個盒唔算多。另外,店經理表示佢地從來都冇應成過客人「自己入盒」,因為驚點心太熱,客人自己入盒會整親,所以唔會比客人咁做。

部分網民理解添好運嘅立埸,話如果食屙環保撚都唔知邊個負責好,而且午市時間咁忙,邊個得閒理你。

不過都有網民話,如果添好運做唔到,一早講,咁可以選擇唔買,而且怕「客人自己入盒會整親」依個講法太唔合理。