日前,有巴打表示自己17歲嘅細妹考DSE前夕,同一名同校嘅師兄拍拖,仲要次次都唔帶套中出!搞到有咗,雖然依啲事老是常出現,但係今次爆嘅係樓主雙親!佢地叫自己個囡唔準落仔,仲要個囡配合自己扮老來得子!好CLS呀!

樓主表示,連細妹都唔知到底係幾時搞大個肚,係最近生理期唔對路先買驗孕棒。而樓主父母又係非常傳統死要面嘅人,所以唔容許自己個囡落仔,但同時礙於面子問題亦唔容許自己個女奉子成婚。所以度咗條驚天地嘅「橋」,就係等自己個囡DSE完果個暑假係屋企養胎生仔,再扮係自己老來得子!

而樓主就話,成件事最大嘅問題,反而係嚟自經濟問題,因為本來雙親都有嘢做,亦都係依賴依兩份人工養起一家五口。但如果要講依個咁大嘅大話同做戲做全套,樓主老母就有幾個月都唔可以返工,但又冇醫生紙拎唔到有薪產假。而當中樓主同樓主哥哥都仲係大學生,冇十足嘅經濟能力,就問各位網民成件事可以點搞。

而大部分網民都覺得依個諗法非常CLS,等於剝削咗BB知道自己父母係邊個嘅權利。而且細妹亦唔可以認自己個仔,只能日日叫佢細佬,咁樣都太慘無人道。不過,樓主又突發話自己個妹突然嚟咗m喇,原來虛驚一場啵。