近日有位𡃁模連同兩位友人到尖沙咀港運廣場一間法餐餐廳慶祝生日,但佢地一行三人就鬧爆話侍應嘅服務態度唔好又冇禮貌,而且想refill麵包嘅時候又太慢,再加上餐廳餐巾甩色又冇濕紙巾就搞到𡃁模三人暴走,仲話搞到喊咗出嚟。

話說𡃁模遲到,咁啱上包嘅時候佢先嚟到,發現送到麵包只有2個,她們就質問侍應點解唔啱數,而侍應就解釋話係應客人人數而定,而眼見𡃁模啱啱到咗,亦答應會加包,但係由於麵包啱啱派晒,要再「等等」,亦因為咁,𡃁模同朋友們就已經嬲喇~

之後𡃁模發現餐巾會甩色,因此就問侍應拎濕紙巾,但係侍應表示佢地冇,但可以帶𡃁模去洗手間。𡃁模覺得侍應冇心解決問題,所以即刻取消未到嘅食物,並喊晒口咁同經理投訴侍應態度唔好。𡃁模要求侍應道歉,經理則代為道歉亦已主動提供全單免費。但𡃁模不滿經理冇主動問聯絡方式,認為經理冇心跟進問題,於是就話:「「我哋一定會投訴你哋!投訴到你哋總公司!」

於是佢地三人除咗喺Instagram鬧爆之外,仲上埋該餐廳嘅法國Facebook專頁投訴,搞到侍應被炒。𡃁模友人知道後,表示「目標已達到」。令成班網民怒插,洗唔洗去到咁盡!