Facebook一早就融入咗我地嘅生活,而依位台北媽媽仲因為Facebook各路網友嘅相助而「獲救」。話說依位媽媽事主喺今日(12日)凌晨時份,於自己喺松山區嘅屋企內陪緊個囡訓緊教,但竟然驚覺疑似有賊仔入屋。只好攬實個囡忍住緊張嘅情緒下Post Facebook 求助!

有關Facebook嘅「求助個案」喺網上瘋傳,引嚟過百網友關注。而台灣網民們仲透過Facebook溝通,並由事主委託網友報警。而台北松山分局警方收到個案後派出10幾名警員配以真槍實彈,仲著晒防彈衣揸偵防車、警車等去救人!但點知去到嘅時候鐵門深鎖,事主又怕會被賊人攻擊,所以唔敢出房,無法幫警員開門。而大批警員相當擔心事主安危,所以再通報消防局出動破壞器材車到埸,再以電鋸、切割器破壞鐵門,諗住一破到門就立即攻堅!

 

而警方除咗著晒成套裝備,喺門後連槍都掹埋,準備好晒之外,連大廈樓下都安排咗一隊人馬監視外牆,就怕賊仔會爬牆走人!成個氣氛緊張到咗一個極點!喺得到事主FB表示可以攻門之後,警消就做野!

但警方破門後,劇情峰迴路轉,人就見唔到……………只係見到…「掃地機械人一部」…在埸嘅警員同消防員都樣都即刻「囧」咗…警方千算萬算都真係估唔到「發出聲響嘅入屋賊仔」係一部因為事主新買亂按而搞到半夜自動開機嘅掃地機器人…台灣警方苦笑:「這應該是台灣治安史上第一例,因掃地機器人引發大批警力破門救人的特殊案例」。但事件傳出後,網民都讚揚當時幫手報警嘅熱心網友,亦讚揚警方嘅高度關注。

^涉事「賊人」