愛犬有病,主人緊張無可厚非亦係責任,但如果係咁會唔會有啲荒謬呢?一名男子攜同佢嘅金毛尋回犬嚟到一間醫院嘅急症室要求急症室醫生救佢隻狗。醫生拒絕,表示依度係人住嘅醫院,唔係動物醫院;而佢更係醫生而唔係獸醫,冇能力去救狗後,男子情緒爆發,癲咗咁大鬧醫院!網民都話要救嘅唔係隻狗,而係依條友。

  

事件發生喺廣西,一名男子闖入廣西民族醫院急診科急症室吵鬧,要求急症室當值醫生救佢隻成年金毛汪。但醫生解釋話依度係人住嘅醫院,唔係動物醫院;而佢哋亦都係醫生而唔係獸醫,因此並冇專業知識醫狗,並請佢將佢隻狗帶出醫療區。 但依名男子聽到之後情緒非常激動,扯住醫生嘅醫生袍,再拎電話出嚟影相、拍片。佢要脅醫生,話如果佢隻狗死咗,醫生要負全責。

醫生阻止男子係急症室影相,並要求佢立即出去,因為有多位病人需要急救。點知個男子改為突然跪低,大聲嚎哭,並用力又打又踢急症室嘅門,及威脅話要殺死個醫生。後來男子同佢隻狗被保安強制驅離先至結束依埸鬧劇!其後,男子被判行政拘留十日。