唔少人都希望藉住交友App識朋友從而擴闊生活圈子,更有不少孤單寂寞覺得冷的單身男女想係App上找到另一半,但也因此令無良商人有機可乘。有報章報導,一間位於旺角的美容店不惜與成隊「美男中介團」合作,不斷以「心理戰」進攻各位「少女」心。

據《蘋果日報》報導,一班打扮新潮及全身名牌的「美容兵」為了可以成功得到女神「芳心」不惜出動200萬白色瑪莎拉蒂盡力炫富,再以富貴暖男形象打動「少女」芳心。由記者所跟訪的車主Simon,即使居於距離美容院5分鐘路程的SKYPARK,仍堅持每日開跑車上班,並經常曬命遊艇出海、豪宅、高級餐廳用餐照等。

39歲任職超級市場的港女Kerry表示:「佢冇提過自己做美容,我只係知佢生活質素好好,佢間屋好靚,有令人好羨慕嘅車、手錶,令我覺得將來同佢一齊,我生活都會好。」當Kerry放下心防後,Simon就帶了Kerry上美容院,期間美容師唱雙簧:「Simon第一次帶女仔上嚟,妳係咪佢女朋友?」

其後美容師推介13.8萬元的60次美容療程,但眼見在超巿工作,月入僅13,000多元的Kerry無力支付下,改為推銷6.9萬元套餐。而Kerry心想,好想Simon做自己男朋友,如果不參加,佢就不會認定我是女朋友。所以把心一橫就碌了卡,但交易成功後,Simon就完全封鎖Kerry的聯絡方式。