52歲嘅超級鑽石筍盤「小小超」李澤楷,2016年被踢爆同細自己26年嘅港姐季軍郭嘉文(Karmen) 拖手仔拍拖。郭嘉文為了專心做千億女友,基本上已淡出娛樂圈,入住過億九龍塘豪宅,不時陪李澤楷外遊拍拖。直至上個星期日,李澤楷終於用行動正式公開郭嘉文的女友身份,首次拍拖現身沙田馬場。兩人以襯到絕嘅藍色情侶裝打扮現身,兩人全程企定定任影唔嬲,而且笑容一致,凸顯出兩人拍拖三年,感情穩定。

不過兩人嘅年齡差距就引起全城熱話,外號鑽石媒人、香港婚姻介紹所董事總經理廖吳美玲(Meiling)表示,「忘年戀」喺香港越來越普遍,好多都係「老夫少妻」;佢覺得網民應該放底老土嘅觀念,兩個人一齊最重要係「夾」,而唔好去計較年齡嘅差距。