前港姐季軍,港大法律系包尾畢業嘅何豔娟,去年與身家30億嘅66歲澳博營運總裁吳志誠結婚,兩人相差40年嘅爺孫戀一度轟動娛樂圈。自結婚之後,何豔娟一直都過住少奶奶嘅生活,得閒晒下鑽介、遊埠咁樣,就算喺大台冇任何代表作,都睇得出佢嘅生活過得奢華舒服。但係琴日何豔娟突然宣布要同吳志誠和平同埋友好地分開(離婚),兩人嘅爺孫戀婚姻只係維持咗十個月,令眾人嘩然。

 

不過唔少網民睇到新聞之後,都「大讚」何豔娟有生意頭腦,用10個月嘅時間,就有分佢30億身家嘅機會,離婚致富依招果然係厲害。而小編就為大家Google咗下,發現全球共有66位億萬女富豪,而其中只有6位係靠自己白手興家,換言之其他60位都係靠遺產繼承或離婚致富…

最為人所熟知嘅「離婚致富」嘅事例,可能係依位42歲嘅新加坡名媛蔡欣穎,本來只係做空姐賺份人工,與「名媛」「奢華」依啲名詞冇咩關係,但自從佢嫁咗畀45歲印尼華僑富豪 努爾迪安•朱阿扎 後,就過住富家女嘅生活,除咗擁有百幾二百個不同顏色、材質嘅愛馬仕包包之外,每個月為豪宅所佈置嘅鮮花就已經花費幾萬蚊。即使佢哋已經離婚,唔計「離婚分身家」,每個月都可以得到一至二千萬嘅贍養費。

而講到全球首富,就非亞馬遜公司執行長貝佐斯莫屬,坐擁8700億身家,而今年佢宣布同結婚26年嘅妻子瑪肯西發共同聲明指決定離婚。雖然亞馬遜公司係佢哋結婚之後先至成功嘅「產物」,但瑪肯西都算「大度」,放棄 75% 兩人共同持有的亞馬遜股份,以及所有投票權;亦將「華盛頓郵報」以及太空探索公司「藍源」所有股份交給前夫貝佐斯。但佢依然分得約2800億,成為世界第三女富豪。