每個人都總會有d收集癖好,而男人永遠都好似個大細路咁,亦總有d嗜好同興趣,例如收集玩具咁,不過如果另一半都唔尊重自己愛好,就真係「慘絕人寰」啦!因為日前有女網民趁老公唔係屋企嘅時候一將老公珍藏喺屋企嘅珍貴《復仇者聯盟》角色模型以賤價1000蚊全部出售。唔少網民批評咁嘅行為相當過分,有可能會搞到家變,更建議如果老公夠狠心,應該要報警處理咁話!!!

日前一名女網民係FB群組「Hot Toys, King Arts 1/6 玩具人偶自由交易區」入面表示,自己老公睇咗《復仇者聯盟4》之後好似中邪咁,日日收工返嚟都會帶住「一盒二盒玩具」,而且投訴老公「四十幾歲仲好似小童咁樣」。最後更同各「買家」明言,要買要快,因為老公返嚟就唔賣得。

但據知單係其中一隻Hulkbuster已經炒到過萬蚊,全部加埋粗略估計更加總值過2萬3千蚊。不過好在香港有愛,唔少網民呼籲同好都「唔好接貨」,亦唔好「汁平貨」,更有人話可以畀錢但代老公保管,等老公返來之後認領。