超熱播劇集《權力遊戲》多年嚟被稱為神劇,更因此儲落唔少死忠Fans,但從第八季開始,就瘋狂惹負評。最近Do姐喺佢嘅電台節目入面開咪勁鬧,追劇多年,但劇集爛尾,搞到成套劇嘅角色設定非常唔合理,唔知有幾多人認同do姐呢?  

Do姐一直都是權力遊戲迷,百忙中都追劇追咗8年,終於忍唔住係節目中指出多個不滿位,包括劇集連續出現水樽和咖啡杯等穿崩位、男主角Jon Snow竟然棄養劇集象徵之一嘅雪狼。Do姐仲話勁嬲個編劇:「我已經好嬲喇,唔鬼想睇喇!呃咗我咁!好似龍母咁,佢哋原來鋪排到佢好有愛啦,好似第五集咁,發神經呀佢!」

Do姐愈講愈火起,「等咗十年嚟睇,我都好興奮呀你明唔明呀?但睇睇吓好似唔對路咁!」因為Do姐話「佢哋兩個(劇中Jaime與Brienne嘅感情線),係由第二季定第三季開始就煲佢哋嘅感線,煲咗7、8年!即係以我哋觀眾嘅時間嚟計,唉!咁然後終於喺第四集行埋啦,突然之間就變咗,我都係唔愛你喇,我要返返去我之前愛嘅女人身邊!我當時嘅反應係,吓?你明唔明呀?好嬲呀!係一個好重嘅基礎!再多我都唔睇喇!而家呢六集,等咗成年,真係放個屁就冇咗!嬲到爆呀!」