自從K POP文化入侵香港00後年齡層,周街MK仔已經不復見。取而代之嘅係唔同嘅偽韓文化,宜家嘅00後偶像唔再係當年古惑仔,而係唔同嘅韓國oppa oppa。

 

早前喺連登就有網民「想當年」,諗起當年Addias波鞋聯乘Gucci避彈「背心」嘅英姿,一比對之下,發現今時今日嘅MK文化已變成唔係賣倫敦金就保險狗AA狗,姑勿論班mk仔點樣以中三學歷就可以有驚人嘅先見之明幫大家投資增值。

 

單係對比以前MK仔自拍照所呈現到嘅直接加埋post相上網嘅過人勇氣,就已經令人無法忘記以前MK仔嘅魅力。例如,一邊濃密嘅頭髮,完美咁掩蓋着單眼嘅視野。就可以睇出,MK仔視力係有幾咁好、幾咁銳利!另外,幾乎所有MK條褲都係就跌得嚟又唔會跌,又可以畀大家知道MK仔嘅下盤同馬步都係相當穩陣!

再加上當年嘅MK妹喺並未有美圖秀秀呢類充滿欺騙成份嘅軟件大行其道之時,亦冇咁多假相嘅存在。但往事只能追憶,當年真.本土嘅MK仔斷估都唔少做晒人哋老豆,搞到唔少網民都話要將當年嘅MK文化封為本港非物質文化遺產。