原藝名”梁烈維”、暱稱”唯唯”、讀音”唯萎”、英文名”Oscar”、曾被網民封為”負評王”、新名”梁競徽”、新暱稱”競徽”、被網民讀成”勁廢”、最近被賜勇武新名”勁fight”嘅唯萎,一直都係愛國藝人中嘅表表者,例如喺微博表示自己身為一個中國人而感到驕傲,因此多次被冠上「負皮王」嘅稱號。

 

不過自6.9號開始忽然受唔少香港市民愛戴,因為有超過2000條留言灌爆唯唯Instagram,讚揚佢喺反送中遊行中十分落力。唔少網民表示,當時見到唯唯都好驚訝佢會嚟支持,仲話聽到佢一時嗌口號,一時支援示威者咁話。

有網民更留言話「明白你作為藝人好難去公開咁講,但你嘅心意,我收到喇,多謝你」、「噚日69遊行見到你一起反中,真係好驚喜,估唔到你只係表面愛國」、「多謝你為香港付出,勇武到最後」。暗指唯唯只係因為公眾人物身份而冇辦法公開立場。

不過事件畀廣大嘅微博網民知道咗之後,搞到唯唯隨即被鬧爆,喺唯唯微博留言洗版,鬧爆唯唯。唔少大陸網民都話對佢好失望。「昨天腰捍挺直帶頭叫口號,表面愛國,暗地支持港獨」、「IG好多人都說看到他叫口號,幫助其他參加者,反中亂港份子不配做中國人」。

對於此事,唯唯喺今日中午時分喺微博澄清話自己冇去過,事隔一陣連佢經理人都重申唯唯冇去過。搞到唔少網民都「轉呔」叫大家唔好「篤灰」,話要保護「義士」。因為唔想唯唯好似其他藝人咁因為政治立場被封殺。事件嘅真相到底係點呢?事件係咪已發生曼德拉效應就冇人知了,你哋又會信邊一邊呢?